السبت، فبراير 11، 2012

و قالها و هوَ مِتعَصَب ماليش مَطَلب غير إنِك تبقى حساني


و قالها و هوَ مِتعَصَب ...
ماليش مَطَلب
غير إنِك تبقى حساني
و سَنداني على الأيام
و فـ الأحلام تحاوطيني
توافقيني
على الكِلمة و لو بالزيف !
توافقي حتى عـَ التخريف
تهاوديني فـ عِز الشِدة
و الأزمة
و مالوش لازمة
تعانديني
و تُقفي قصادي نِد لـ نِد
مالوش لازمة تكوني الضِد
ياسِت الكُل طاوعيني \ و أنا مجنون
أكون الدوشة
كوني سكون
و لو لاقيتني يوم قاسي \ خُديني جوا حُضن حُنون
أكون المد \ كوني الجَذر
أكون الضَلمة \ كوني الَبدر
و كوني الرِقة و الضمة
\ وكوني الفَتحة و الــ [ ضَمة ]
و كوني الكـــــــــــــــــــــــون
و سايعاني
و مهما عملت .. تتهادي
و مهما زعلت .. هـَ تراضي
و مش قولتيلي كون إبني \ و أنا موافقة !؟
ماشوفتش أُم بتهاجر
و لا تِزهَق
و لا بـ تمِل
و لا مـِ الحِمل لحظة تكِل
و لا هتقولي يُوم .. إمشي
مترجعشي
و لا لندايا .. تسمَعشي !؟
ده إنتي الدُنيا و الحاجة
و راحتي لما يوم بَتعب
و لو بغضب .. مانا راح أروق
و نتصافى
و أطبطب قلبِك الموجوع
و أدمَع لو ألاقي دموع
و أنا العارِف بإن الذنب ده مَشفوع
و إن الغَمة هتعَدي
لكن بدي \ من الأول و للأخِر
تكوني معايا ... مِش ضدي
.......
بِقَلم \ عَـزيــزة عَــلي

ليست هناك تعليقات:

إرسال تعليق