صحوني وصحيت من نومي

صحوني
وصحيت من نومي
مش عارف ليه مش متطمن؟
اليوم ده شكله مش يومي
أنا صاحي قافش ومخون..
وأنا فاتح قلبي ع البحري
و الغلطة
بعشرة أمثالها
مش خايف من حد ولكن
خايف
من نفسي و أمثالها..
أنا فاتح قلبي على البحري
و الحجة ان أنا إنسان
ندمان على ايه أنا مش عارف
أنا خايف أكون مولود ندمان.
يا قمر في العتمة مونسني
أنا مين من نفسي هيحرسني؟
دعوة أهاليا أم عملي؟
نظريا
لازم أكون عملي
و افوق م الكاس المتشبر
من فترة
باحاول اني اكبر
و اتدمر
كل ما تلمسني
حاجة في ضميري بتوجعني
لا سايبني ضميري استطعم
ذنبي.. ولا قادر يمنعني
ريحتك في هدومي مخيلاني
مين فينا الاول للتاني؟
مش شايف ازاي شايفاني
قلقانة صورك ف دماغي
قلقانة لدرجة قلقاني...
يا ذنوب ع الواحد مكتوبة
و يا توهة محتاجة خريطة
توريطة
و يارب التوبة
ودي حتى التوبة توريطة.
لــ عمر طاهر