فيه حاجات ..
مستحيل راح تتنسى
وحكايات..
تطوى قلبك بالحنين لو يوم قسى
لسة فاكر عود بخور بيقيد فبيتكم كل جمعة
لسة ريحته بتحضنك؟
وللا فاكر فالكنيسة ؟
لما تجرى تقيد فى شمعة
لجل نورها يطمنك؟
وللا اول يوم حضانة؟
لما ضمة حضن امك كان غرضها تسكّنك؟
بس كانت غصب عنها تدوقك ..طعم الفراق
طب وفاكر الخناق؟
وللا دوشة السباق
بالعجل فوق الرصيف؟
طب وفاكر الخريف؟
والدفا فقلب المطر؟
وللا فاكر السهر؟
قرب فجر فليلة صيف؟
ّ~
مرة واحدة يجرى عمرك..كله فات
تلقى فجأة مش فاضلك غير ساعات
وانت من حجم المفاجأة..
يبكى قلبك من سكات
مش باقيلك من حياتك ..غير ممــات
كل لحظة عشتها..
لما تخلص
كات تفضّى جيوب فقلبك او خانات
وان وصلت المنتهى..
مش هيفضل غير فلاش باك الحجات
..وقتها
العبارة بتتحسب بالذكريات
..والامارة
انت من غير ذكريات
زى مركب من ورق
زى فيلم مالوش أفيش
لو شريط نيجاتيف حياتك اتحرق
تتنسى..تصبح مفــيــش
هو ايه الانسان دة اصلاً
..غير شوية ذكريات
وحكايات
مرصوصين فى شريط لفيلم بيتعرض..
من خلال سينما الحياة
نبتدى فتصويره لحظة نتولد
..يتكتب تتر النهاية
بالوفــاة
لــِ اسراء مقيدم
