الخميس، يونيو 30، 2011

قالولى زمان وأنا صغير مفيش انسان بيتغير



قالولى زمان وأنا صغير
مفيش انسان بيتغير
وقالوا الوش والماسكات
تملى عمرها قصير
ومادام الطبع كالعادة .. تملى بيغلب التطبيع
هتفرق تربيــة زياده .. فى واحد بالجينات هيصيع !! ؟
أنا صايع على الفطرة .. ولا بكيفى ولا بيدى
وكل ما أقول أكيد فتره .. ألاقى العمر بيعدى
ولسه السنكحه كيفى .. ولسه السرمحه فى دمى

ولسه ببوسها فى السيما
وتضحك أقولها اتلمى
ولسه بلف فى الشارع وأنا معرفش رايح فين
وفى الفجريه على الكوبرى مفيش غيرى مع الأسدين
بدندن لحن أغنيه وتيجى انتى على بالى
فصوتى يبتدى يقطع
ودمعة ف عينى بتلالى

فأطلع نوتة الأشعار وأقطع كل أوراقها .. واّفرّقها
وتيجى الريح تبعزقها على الأسفلت فى الشارع
ياست الكل أنا واقع فى عرضك لأجل تقريهم
وبعد متقرى ارميهم أو انسيهم
بحكم الطبع والعادة هتيجى قصايدى متعادة
ومادام كار الكلام كارى .. ومفيش غيرك فى أفكارى
هتفضل كل أشعارى ... مفيش غيرك بنات فيهم 


لــ مصطفى إبراهيم


ليست هناك تعليقات:

إرسال تعليق