أنا عندي ليكي حضن
أخضر لون الحياة
والأزرق منتهاه
ألوان صنع الإله
ولما يقولّلي كُن
أكون وأنا مطيع
أنا عندي ليكي حضن خديه أحسن يضيع
من أول ما ابتديت
وحضن أمي بيت
من صدرها ارتويت
لبن ونور وحُسن
وحنان وكون بديع
أنا عندي ليكي حضن
الأرض حاضنة قمح
والغيط أسمر وسمح
وماء ودقيق وملح
عجين يخش فرن
ياكل منه الجميع
أنا عندي ليكي حضن
راعي الغنم يطوف
بالناي وبالحروف
وينام يصحى يشوف
الصوف بيبقى قطن
من أول الربيع
أنا عندي ليكي حضن
عصفور يعشق قمر
ويطير وسط المطر
ويحط على الشجر
ولسه صدره سخن
وقلبه سريع سريع
أنا عندي ليكي حضن
شارع طالع بسلم
والليل نهار مضلم
في عنيكي شوق يسلم
وشفايفك فيها بُن
وشفايفي كما الرضيع
أنا عندي ليكي حضن
في حضنك السلام
وبرّاه الآلام
الديب لحس الكلام
ومفيش في الدنيا حزن
على الحمل الوديع
أنا عندي ليكي حضن
.jpg)
ليست هناك تعليقات:
إرسال تعليق