فيا حاجه لسه ناقصه
كل حاجه فيا نُص
حتي قرب مني حبه
جوا مني بعين وبُص
هتلاقيني نُص صاحب
نُص حابب
شيخ و لابس نُص كُم
واما بفرح نُص فرحه
تيجي حاجه اوام تُغم
حتي كل ما احب حاجه
تختفي وتعملّي بوم
واللي حاضن حضن كامل
تاه ومش ممكن يضُم
قوللي حالاً يا عزيزي
بعد ما خلصت بَص
هل يجوز البرتقانه
تبقي ناقصه حتي فَص ؟
واللي جايز يشتريني
كيلو واحد بالمشال
يكتشف بعد المناهده
والمجادله والفصال
انه شاري الكيلو لكن
يجي يوزن او يبُص
يلقي حاجتُه لسه ناقصه
ويلاقيني بس نُص
لـِ محمد عزيز
ليست هناك تعليقات:
إرسال تعليق